Countdown cina al’estinziun

Por la mostra "Countdown to Mass Extinction", metüda fora tl Museum Ladin da San Martin de Tor, unse curé le conzet espositif y le graphic design. La mostra esplorëia le liam danter l’estinziun de massa dl Permian y les sfidades climatiches atuales. Tres n percurs imersif y visivamënter atraënt, culminëia l’esposiziun te na cherdada al’aziun, sotlinian sciöche les emisciuns atuales pó avëi conseguënzes devastantes nia tan atramënter da chëres dl passé.

L’identité visuala dla mostra roda incër n simbol sterch: n’ora a saurun en combinaziun cun na X, che rapresentëia sides le passé dl tëmp che ne vá nia da archité sides la fin. Chësc simbol ne nes recorda nia ma dla gara cuntra le tëmp por salvé le planët, mo sotliniëia ince l’urgënza da capí i prozesc naturai che manacia la biodiversité. La paleta cromatica recorda la natöra: le cöce neon rapresentëia l’energia desdrutiva dles eruziuns vulcaniches, le ros recorda i corëc y i fossii, y le fosch, sot y dramatich, trasmët gravité y urgënza. La tipografia, chirida fora por süa flessibilité, injunta n aspet de rigorosité scientifica y modernité, acompagnan i vijitadus te n’esperiënza visiva tlera y de gran impat.

Tl secundo salf dla mostra, splundra le presënt adöm cun le dagní. Chiló, dilan al’adoranza inovativa dl’inteliënza artifiziala, sunse jüs sura i limic dla conescënza umana fora, recostruin fossii y concores dl Permian mai ciamó odüs. L’AI, metüda pro cun le suport dl curadú Herwig Prinoth, ti á dé vita nöia a n monn scomparí da deplü co 250 miliuns d’agn, ofrin na vijiun straordinara de ci che é sté. Chësc stromënt potënt de simulaziun se combinëia cun n video imersif che coliëia les devastaziuns dl’estinziun dl Permian cun les emergënzes climatiches atuales.  Le messaje final ne lascia degöna lerch al’anfataria: le passé nes avertësc, y le dagní depënn da nostes aziuns da sëgn. L’inteliënza artifiziala ne n’é nia ma na tecnologia d’avanguardia, mo na verda che nes mostra i risć de nosta passivité.